Në një rajon ku ekuilibrat e sigurisë janë të brishtë, Kosova po hyn në industrinë e municioneve përmes ndërtimit të fabrikës së parë në Jahoc të Gjakovës, me prodhimin e parë që pritet në fund të vitit 2026. Marrëveshja është nënshkruar me kompaninë shtetërore turke MKE, ndërsa kryeministri Albin Kurti thotë se zona industriale do të hapet edhe për prodhimin e dronëve ushtarakë dhe civilë “Made in Kosova”. Eksperti amerikan Ray Wojcik e vlerëson nismën si hap në kohën e duhur dhe në linjë me pritjet e NATO-s, ndërsa ekspertë të tjerë paralajmërojnë se lëvizja mund të perceptohet si kërcënim nga Serbia, e cila mbetet fuqia kryesore ushtarake në rajon. Kosova synon të ulë varësinë nga importi, por jo të ndërtojë një industri të madhe të mbrojtjes, ndërsa analistët theksojnë se projekti duhet të komunikojë qartë natyrën mbrojtëse dhe të mbetet i koordinuar me aleatët perëndimorë. (REL)