Tri ditë negociata SHBA–Ukrainë pa rezultate konkrete, Zelensky kthen fokusin kah Evropa

Tri ditë bisedime në Majami mes zyrtarëve ukrainas dhe atyre amerikanë janë mbyllur në një atmosferë pozitive, por pa ndonjë progres të dukshëm, ndërsa presidenti ukrainas Volodymyr Zelensky po përgatitet të takohet me liderët evropianë më 8 dhjetor për të diskutuar hapat e radhës drejt paqes.

Disa orë pasi Zelensky tha se kishte zhvilluar një bisedë telefonike “shumë konstruktive” me ekipin amerikan të negociatave – të drejtuar nga i dërguari i posaçëm Steve Witkoff dhe Jared Kushner, dhëndri i presidentit amerikan Donald Trump – Rusia vazhdoi sulmet ajrore gjatë natës ndaj infrastrukturës kritike ukrainase, pavarësisht kushteve të vështira klimatike.

Kryetari i qytetit industrial Kremençuk tha se zona është goditur nga një sulm “masiv” që ka shkaktuar ndërprerje të energjisë elektrike dhe ujit, ndërsa nuk raportohet për viktima. Sulme ajrore janë shënuar edhe në Slloviansk, ku janë plagosur shtatë persona. Rusia pretendon se ka rrëzuar 77 dronë ukrainas në rajone të ndryshme gjatë natës.

Pas takimeve në Florida, Zelensky shkroi në Telegram se “Ukraina është e përkushtuar të vazhdojë punën e sinqertë me palën amerikane për të arritur një paqe të vërtetë”, duke shtuar se palët janë pajtuar për hapat e ardhshëm dhe formatin e bisedimeve, megjithëse pa detaje të tjera.

Takimi me Evopën

Zelensky do të udhëtojë të hënën në Londër, ku do të takohet me kryeministrin britanik Keir Starmer, presidentin e Francës Emmanuel Macron dhe kancelarin gjerman Friedrich Merz për të diskutuar procesin e paqes.

“Ukraina mund të llogarisë në mbështetjen tonë të palëkundshme. Kjo është thelbi i përpjekjeve të Koalicionit të Vullnetit”, tha Macron më 6 dhjetor, duke shtuar se grupi do të bëjë një vlerësim të negociatave të deritanishme.

Evropa ka qenë skeptike ndaj draftit të parë të planit amerikan për paqe dhe ka kërkuar që shqetësimet e Kievit të përfshihen në dokument. Versioni i fundit i përditësuar i propozimit nuk është bërë publik.

Shpresat dhe dilemat e planit për paqe

Plani i rrjedhur amerikan prej 28 pikash në nëntor u pa nga Ukraina si shumë i favorshëm për Rusinë. Ai është rishikuar disa herë, por ende ka paqartësi mbi garancitë e sigurisë për Ukrainën dhe mundësinë e ndonjë kompromisi territorial.

Rusia aktualisht kontrollon rreth një të pestën e territorit ukrainas, përfshirë zona në Donbas – rajonet e Donjeckut dhe Luhanskut.

Negociatat në Majami pasuan vizitën e Witkoff dhe Kushner në Moskë, ku ata zhvilluan bisedime me presidentin rus Vladimir Putin. Presidenti Trump deklaroi më 3 dhjetor se takimi ka qenë “shumë i mirë” dhe se “Putin dëshiron t’i japë fund luftës”, edhe pse nuk është arritur ndonjë marrëveshje konkrete.

Putin nga ana e tij ka shprehur gatishmërinë për t’u takuar sërish me delegacionin amerikan “sa herë të ketë nevojë”.

Lufta vazhdon

Lufta në Ukrainë filloi më 24 shkurt 2022. Rusia e quan ndërhyrjen e saj “operacion special ushtarak” për demilitarizimin e Ukrainës, ndërsa Perëndimi ka reaguar me sanksione të ashpra ndaj Moskës.

Konflikti ka shkaktuar mijëra viktima dhe ka zhvendosur miliona njerëz nga shtëpitë e tyre.