Gjykata Themelore në Prishtinë ka dënuar me dy vite burgim dhe 14.000 euro gjobë Lubisha Millkoviqin, pasi ai pranoi fajësinë për sulm ndaj ushtarëve të KFOR-it dhe Policisë së Kosovës gjatë protestës së 29 majit 2023 në Zveçan.
Millkoviqi arriti marrëveshje me Prokurorinë Speciale, duke pranuar akuzat për sulm ndaj personit zyrtar dhe pjesëmarrje në turmë që kryen vepër penale dhe huliganizëm. Sipas avokatit të tij, marrëveshja u nënshkrua me vullnet të plotë. Ai do të mbetet në paraburgim deri në formësimin e aktgjykimit.
Përleshjet e vitit 2023 lanë të plagosur mbi 90 pjesëtarë të KFOR-it, si dhe protestues serbë. Trazirat shpërthyen pasi serbët lokalë kundërshtuan hyrjen e kryetarëve shqiptarë në komunat veriore të Zveçanit, Leposaviqit dhe Zubin Potokut, pas zgjedhjeve të bojkotuara nga komuniteti serb.
Autoritetet kosovare kanë arrestuar dhjetëra të dyshuar për dhunën në Zveçan, me disa dënime tashmë të shqiptuara pas marrëveshjeve për pranimin e fajësisë.
