SHBA sjell në Kosovë trupat paqeruajtëse armene, i përcjell koloneli Crowe nga Jerevani
Një kontingjent trupash paqeruajtëse nga Armenia ka mbërritur në Kosovë për t’iu bashkuar misionit të KFOR-it, të transportuar me aeroplan ushtarak amerikan dhe të përcjellë nga Yerevani nga atasheu amerikan i mbrojtjes, koloneli Crowe.
Në njoftimin e Ambasadës së SHBA-së në Armeni, theksohet se Armenia mbetet një ndër kontribuesit më të mëdhenj jo-anëtarë të NATO-s në KFOR, madje duke tejkaluar disa shtete anëtare të NATO-s dhe BE-së.
“Ky përkushtim i vazhdueshëm tregon rolin e Armenisë si partner i besueshëm në operacionet rajonale të sigurisë dhe gatishmërinë e saj për të punuar krah forcave aleate,” thuhet në deklaratë.
Ambasada amerikane vlerësoi kontributin armen si pjesë të qëllimeve të përbashkëta për forcimin e koalicioneve dhe nxitjen e partneritetit të sigurisë në rajonin e Kaukazit.
