Shpërthim me lëndë plasëse në Kurbin, dyshohet se shënjestra ishte këngëtari Jozi

Një shpërthim me lëndë plasëse është regjistruar në orët e para të së martës, në fshatin Gurëz, njësia administrative Fushë Kuqe, Kurbin.

Policia njofton se rreth orës 04:20, në derën e jashtme të oborrit të banesës së shtetases M. D. është hedhur një sasi e vogël lënde plasëse, e dyshuar artizanale. Nga shpërthimi, porta pësoi dëmtime të lehta.

Hetimet paraprake ngrenë dyshime se shënjestra e vërtetë mund të ketë qenë këngëtari Jozefin Marku (Jozi).

Në vendngjarje shkuan menjëherë forcat e policisë dhe grupi hetimor, të cilët gjatë kontrollit të zonës gjetën disa gëzhoja të vjetra, që u sekuestruan si prova materiale.

Sipas njoftimit zyrtar, nën drejtimin e Prokurorisë, vijojnë hetimet për zbardhjen e plotë të rrethanave dhe identifikimin e autorëve.