Një influencuese e re meksikane, Valeria Márquez, është vrarë me armë zjarri gjatë një transmetimi të drejtpërdrejtë në TikTok, në një ngjarje tronditëse që ka ngjallur reagime të mëdha në Meksikë.
Sipas prokurorisë së rajonit të Jaliscos, rasti po hetohet si femicid – vrasje për arsye gjinore – ndërsa autoritetet ende nuk kanë identifikuar një të dyshuar.
Ngjarja ndodhi në sallonin e bukurisë ku 23-vjeçarja punonte, në qytetin Zapopan. Autori hyri brenda dhe e qëlloi Márquez në gjoks dhe kokë, në prani të ndjekësve të saj online. Vetëm pak çaste para sulmit, ajo u dëgjua në video duke thënë: “Ata po vijnë”, ndërsa në sfond një zë e pyeti: “Hej, Vale?”. Ajo u përgjigj me “Po”, dhe në atë moment u qëllua për vdekje.
Valeria kishte rreth 200 mijë ndjekës në Instagram dhe TikTok. Në një pjesë të mëhershme të videos live, ajo kishte treguar se dikush kishte shkuar në sallon për ta takuar dhe i kishte lënë një “dhuratë të shtrenjtë”, por ajo kishte refuzuar të qëndronte për ta pritur personin të kthehej.
Autoritetet po vazhdojnë hetimet, ndërsa rasti ka shkaktuar zemërim të gjerë për nivelin e lartë të dhunës ndaj grave në vend.
