Kryetari i Lidhjes Demokratike të Kosovës, Lumir Abdixhiku, është deklaruar pas takimit me presidenten Vjosa Osmani dhe liderët e tjerë politikë, i thirrur për të diskutuar ngërçin institucional në Kuvendin e Kosovës, shkruan Gazeta Express.
Abdixhiku tha se partitë politike mbetën në pozicionet e tyre dhe se nuk pati ndonjë zhvillim konkret drejt zgjidhjes së bllokadës.
“Takimi i sotëm ishte konsultativ, i thirrur nga presidentja. Fatkeqësisht, partitë politike qëndruan në pozicionet e tyre të mëhershme, gjë që tregon se nuk ka ndonjë zgjidhje të afërt për krizën politike. Po ashtu, nuk u pa ndonjë iniciativë që do të mund ta zhbllokonte situatën aktuale,” tha ai.
Abdixhiku shtoi se gjatë takimit nuk vërejti as ndonjë shqetësim të sinqertë e as urgjencë nga ana e partisë që ka shumicën në Kuvend.
“Është për të ardhur keq që pas 16 tentimeve të dështuara dhe më shumë se një muaj vonesash, mungon vullneti për të gjetur zgjidhje. Nga partia që ka 48 deputetë nuk pashë as brengë, e as ndjesi urgjence për ta zgjidhur këtë situatë. Në takim, unë prezantova idenë për një qeveri uniteti”, përfundoi ai.
