Osmani dhe Begaj në Vatikan për homazhe ndaj Papa Françeskut
Presidentja e Kosovës, Vjosa Osmani, dhe Presidenti i Shqipërisë, Bajram Begaj, po qëndrojnë në Vatikan ku po marrin pjesë në homazhet për Papa Françeskun, i cili ndërroi jetë të hënën në moshën 88-vjeçare. Ceremonia e varrimit pritet të mbahet nesër.
Gjatë vizitës në Bazilikën “Shën Pjetri”, Osmani dhe Begaj u bashkuan me përfaqësues të lartë të komuniteteve fetare shqiptare, përfshirë Kardinalin shqiptar Ernest Simoni, Kryetarin e Komunitetit Mysliman të Shqipërisë Bujar Spahiu, Kryegjyshin Botëror të Bektashinjve Haxhi Dede Edmond Brahimaj, Kreun e Kishës Ortodokse Autoqefale Shqiptare Joan Pelushi dhe Arqipeshkvin e Kishës Katolike, Arjan Dodaj.
“Sot, në Vatikan, së bashku me Presidentin Begaj dhe përfaqësuesit fetarë shqiptarë, bëmë homazhe për Shenjtërinë e Tij, Papa Françeskun, për të shprehur respektin e qytetarëve tanë ndaj përkushtimit të tij për paqe, harmoni dhe dinjitet njerëzor”, shkroi Osmani në rrjete sociale.
Edhe Presidenti Begaj theksoi rëndësinë e trashëgimisë shpirtërore që la pas Papa Françesku, duke përmendur përkushtimin e tij ndaj drejtësisë, solidaritetit dhe paqes.
