Kombëtaret e gjithë botës, përfshirë Kosovën dhe Shqipërinë, po presin me padurim të premten, kur në Shtetet e Bashkuara të Amerikës do të hidhet shorti i fazës finale të Kupës së Botës.
Turneu i zgjeruar do të përfshijë 48 Kombëtare nga të gjitha kontinentet, të cilat do t’i mësojnë kundërshtarët e tyre për Kupën e Botës 2026, që do të zhvillohet në SHBA, Meksikë dhe Kanada, shkruan “Gazeta Express”.
Presidenti i FIFA-s, Gianni Infantino, do të shoqërohet nga supermodelja dhe ikona botërore Heidi Klum, e cila rikthehet në rolin që mbajti edhe në Gjermani në vitin 2006. Fituesja e çmimit Emmy tha se ndihet e nderuar të prezantojë eventin:
“Ta udhëheq sërish shortin final, pas 20 vjetësh nga pjesëmarrja ime e parë, është vërtet e jashtëzakonshme. Kupa e Botës e bashkon botën si asnjë event tjetër, dhe të jem pjesë e kësaj magjie – me tri vende mikpritëse dhe 48 Kombëtare – është një nder i madh për mua.”
Në event do të marrë pjesë edhe aktori dhe producenti Danny Ramirez, i cili do të intervistojë legjenda të futbollit.
Tifozët do të kenë mundësinë të shijojnë performanca të yjeve botërorë, përfshirë ish-anëtaren e Pussycat Dolls, Nicole Scherzinger, super-yllin britanik dhe ambasadorin e FIFA-s Robbie Williams, si dhe tenorin e famshëm italian Andrea Bocelli.
