Nata e mbrëmshme ishte natë ëndrrash për Emir Sahitin.
Futbollisti kosovar ishte protagonist në fitoren e Kombëtares së Kosovës pasi kontribuoi me një gol ndaj Qipros, të cilën Dardanët e mposhtën me rezultat të pastër, 3:0.
Për mesfushorin kreativ ky ishte goli i parë për Kombëtaren dhe kjo e bëri të ndihet krenar, mbi të gjitha pasi shënoi para publikut në stadiumin “Fadil Vokrri” në Prishtinë, shkruan “Gazeta Express”.
“Është shumë ndjenjë e mirë të shënosh gol, sidomos goli i parë për Kombëtaren, për atdheun tënd. Po ndihem shumë, shumë, shumë mirë. Me rëndësi që kemi fituar, por është e mirë edhe kur shënon. Ishalla do Zoti me vazhdu kështu me gola, me asistime dhe me fitore”, deklaroi fillimisht futbollisti i Hamburgut për faqen zyrtare të FFK-së.
25 vjeçari, i cili në të kaluarën ka luajtur për Trepçën ’89, Rabotniçkin, Hajduk Splitin e Shibenikun, për faqen zyrtare të FFK-së foli edhe për ndeshjen e muajit të ardhshëm me Rumaninë, e cila do të jetë përcaktuese për liderin e grupit.
Aktualisht, rumunët i kanë tri pikë më shumë dhe e kanë fituar ndeshjen e zhvilluar në Kosovë me rezultat 3:0.
Për këtë, Dardanëve iu nevojitet të fitojnë 4:0 në Bukuresht nëse duan të bëhen liderë të Grupit 2 në Ligën C.
“Ka me qenë ndeshje shumë e fortë, ne duhet të jemi shumë të përgatitur. Duhet të shkojmë atje për ta fituar ndeshjen, kurgjo tjetër. Duhet të jemi100 për qind maksimalisht dhe shpresojmë që asnjë lojtar që ishim sot të mos jenë të lënduar, që të jetë krejt grupi mirë, shëndosh dhe të shkojmë në Rumani për ta bërë maksimumin tonë”, përfundoi Sahiti. /Gazeta Express/
