Gjurmët e spiunëve rusë në Serbi: Arrestime, trajnime dhe operacione destabilizuese në Evropë
Muajin e kaluar, Policia serbe arrestoi disa shtetas të Serbisë, të dyshuar për përpjekje për destabilizim në disa shtete evropiane. Dyshohet se pas tyre qëndron shërbimi sekret rus, ndonëse në komunikatat zyrtare nuk përmendet Moska.
Sipas Prokurorisë së Lartë në Smederevë, 11 shtetas serbë akuzohen për spiunazh, diskriminim fetar dhe kombëtar, si dhe për incidente në Francë e Gjermani gjatë vitit 2025. Veprimet e tyre përfshinin sulme provokuese ndaj objekteve fetare dhe mesazhe diskriminuese, ndërsa autoritetet gjermane paralajmërojnë rrezik në rritje për “aktivitete sabotuese” të nxitura nga shtete të huaja.
Hetimet kanë lidhur Serbinë edhe me trazirat e planifikuara në Moldavi, ku dhjetëra persona dyshohet se janë trajnuar në kampe të organizuara nga shërbimi sekret rus. Policia moldave ka publikuar pamje që tregojnë stërvitje ushtarake në territorin serb.
Ekspertët e sigurisë në Beograd thonë se Serbia është shndërruar në “trampolinë” për ndikimin rus në Ballkan. Parlamenti Evropian dhe Departamenti i Shtetit amerikan e kanë cilësuar prej kohësh Serbinë si një nga mjediset më të ndjeshme për operacione të inteligjencës ruse.
Në vitet e fundit, raste të ngjashme janë raportuar edhe në Mal të Zi dhe vetë Serbinë, duke përfshirë aferën e “spiunit rus” më 2019, ku një video tregonte një oficer të inteligjencës ruse duke i dhënë para një ish-oficeri serb.
Pavarësisht këtyre akuzave, Beogradi vazhdon ta konsiderojë Moskën një partner strategjik, duke mos iu bashkuar sanksioneve të Perëndimit pas pushtimit të Ukrainës.
