Skuadra holandeze e Eredivisie-s, Feyenoord, ka njoftuar se legjenda e klubit, Robin van Persie (41), është emëruar trajneri i ri i ekipit.
Van Persie nisi karrierën e tij si trajner në verën e vitit 2024, kur Heerenveen e angazhoi pas përvojës si trajner i disa ekipeve të akademisë së Feyenoordit.
Koha e tij te Heerenveen u shënua nga një fitore 1-0 në shtëpi ndaj liderëve të atëhershëm të kampionatit, PSV Eindhoven. Megjithatë, ekipi i tij pati edhe momente të vështira, si humbja 9-1 ndaj AZ Alkmaar dhe eliminimi nga Kupa e Holandës pas një disfate 3-2 ndaj ekipit amator, Quick Boys.
41-vjeçari largohet nga Heerenveen pas një marrëveshjeje mes dy klubeve, ndonëse kishte kontratë deri në qershor të vitit 2027. Ai do të nënshkruajë kontratën e re me Feyenoordin të hënën e ardhshme, e cila gjithashtu do të jetë e vlefshme deri në vitin 2027.
Feyenoord ishte pa trajner që nga shkarkimi i danezit Brian Priske në fillim të muajit pas një serie rezultatesh të dobëta, që i lanë 12 pikë larg kryesuesve të Eredivisie-s.
“Të gjithë e dinë sa e veçantë është lidhja ime me Feyenoordin,” tha Van Persie për faqen zyrtare të klubit.
“Jam i emocionuar që, së bashku me një staf të fortë, do të punoj me grupin e lojtarëve në qendrën stërvitore 1908, të luajmë në ‘De Kuip’ përpara Legjionit dhe të arrijmë suksese bashkë.”
