Rey Manaj vendos të qëndrojë te Sivasspori, pritje madhështore për sulmuesin shqiptar
Rey Manaj është bashkuar përsëri me Sivassporin dhe ka vendosur të qëndrojë te klubi turk. Sulmuesi shqiptar kaloi një sezon spektakolar në Superligën turke, duke u shpallur golashënuesi më i mirë i skuadrës me 18 gola dhe i treti më i mirë i kampionatit, pas Edin Dzekos dhe Mauro Icardit.
Edhe pse përflitej për një transferim të mundshëm drejt Serie A, deri tani asgjë nuk është arritur dhe për momentin lojtari do të bashkohet me Sivassporin. Vetëm nëse do të ketë një ofertë të leverdisshme për të gjitha palët, atëherë transferimi do të realizohet. Por për momentin, Manaj do të bashkohet në stërvitje me skuadrën ku “rilindi”.
Sulmuesi njoftoi në rrjetet sociale se do të zbarkonte mbrëmjen e së dielës në aeroportin e Sivasit. Tifozët i bënë një pritje speciale, për të nderuar “yllin” e skuadrës. Me dhjetëra tifozë brohoritën emrin e Manajt, duke krijuar spektakël me flakadanë për t’i dhuruar mirëseardhjen sulmuesit të kombëtares së Shqipërisë.
Edicionin e shkuar, 26-vjeçari shënoi 18 gola në kampionat dhe 4 në Kupën e Turqisë, duke u shndërruar në liderin e Sivassporit dhe në një nga lojtarët më të dashur për tifozët.
