Presidentja e Kosovës, Vjosa Osmani, mbajti një konferencë për media pas një takimi konsultativ me liderët e partive politike për datën e zgjedhjeve të rregullta. Gjatë konferencës, ajo u pyet nga gazetarët nëse ekziston mundësia për zgjedhje të jashtëzakonshme.
Osmani konfirmoi se mundësia për zgjedhje të jashtëzakonshme ende ekziston ligjërisht. Ajo theksoi se kjo mund të ndodhë nëse partitë politike bëjnë një shumicë votash për të shpërndarë Kuvendin, por vuri në dukje se sot në takim nuk pa një disponim të tillë.
“Sipas ligjit, caktimi i datës së zgjedhjeve të rregullta nuk përjashton mundësinë e zgjedhjeve të jashtëzakonshme. Shpërndarja e Kuvendit kërkon 2/3 e votave dhe kjo varet nga partitë politike të përfaqësuara në Kuvend. Për momentin, nuk duket një disponim i tillë, por nëse ndryshon diçka, do ta kuptojmë të gjithë,” tha Osmani. Ajo shtoi se në rast të shpërndarjes së Kuvendit, zgjedhjet do të mbaheshin brenda 30-45 ditësh.
Osmani gjithashtu njoftoi se përgatitjet për zgjedhjet e rregullta po vazhdojnë dhe se do ta bëjë publike datën e zgjedhjeve “sa më parë që të jetë e mundur.”
