Peci: Dy opsione për tejkalimin e krizës politike – qeveri nga VV ose zgjedhje të reja më 15 qershor
Pas dy tentimeve të pasuksesshme për konstituimin e Kuvendit, ministri në detyrë i Bujqësisë, Faton Peci, ka deklaruar se ekzistojnë dy skenarë për zgjidhjen e situatës aktuale politike: formimi i qeverisë nga Lëvizja Vetëvendosje ose shkuarja në zgjedhje të reja.
Në lidhje me këtë të fundit, Peci u ndal te propozimi i kryetarit të PDK-së, Memli Krasniqi, i cili ka përmendur 15 qershorin si një datë të mundshme për zgjedhje. Peci tha se ky propozim nuk është për t’u refuzuar.
“Nuk mund të votojmë në emër të deputetëve të tjerë, ndërkohë që ata mohojnë ekzistencën e tyre politike, me qëllim dëmtimin e koalicionit dhe të kryeministrit Albin Kurti. Opsioni tjetër është shkuarja në zgjedhje, që mund të jetë në interes të vendit dhe një leksion për ata që po mohojnë vullnetin e qytetarëve,” tha Peci në emisionin “Këndi i Debatit” në Tëvë1.
Ai vlerësoi se ideja e Krasniqit për datën 15 qershor është një propozim i arsyeshëm.
“S’po them që e përkrahi drejtpërdrejt, por nuk është një propozim që duhet refuzuar. Ka bërë mirë që nuk ka propozuar 12 qershorin, për shkak të Ditës së Çlirimit. Le ta festojmë këtë datë dhe pastaj mund të shqyrtojmë 15 qershorin apo ndonjë datë tjetër për zgjedhje të reja,” tha ai.
Peci nënvizoi se Vetëvendosje nuk po kalkulon me këtë mundësi, por është e hapur ndaj saj si një proces tërësisht kushtetues dhe ligjor.
“Është një çështje legale dhe kushtetuese, jo çështje kalkulimi. Ne nuk synojmë të shkelim ligjin apo Kushtetutën,” përfundoi Peci.
