Mali i Zi heton të shtënat me armë në kufirin me Kosovën, dyshohet për sulme nga territori kosovar
Policia malazeze dhe Prokuroria në Rozhajë po hetojnë dy incidente me armë zjarri në kufirin me Kosovën – një në korrik 2024 dhe një tjetër më 24 gusht 2025 – kur u dëmtuan objektet e qendrës së skijimit Hajlla-Shtedim.
Kryeprokurori i Rozhajës, Aldin Kallaç, konfirmoi për Radion Evropa e Lirë se në të dyja rastet dyshohet se të shtënat janë kryer nga territori i Kosovës. Sipas tij, Policia e Malit të Zi ka nisur hetimet dhe përmes kanaleve ndërkombëtare i është kërkuar bashkëpunim Policisë së Kosovës, por deri tani nuk ka përgjigje.
Nga ana e saj, Policia e Kosovës tha për REL se nuk ka informacion për incidente të tilla në kufi, ndërsa kryetari i Pejës, Gazmend Muhaxhiri, deklaroi se nuk është informuar për rastet nga homologët e tij në Rozhajë.
(Burimi: Radio Evropa e Lirë/REL)
