LDK: VV s’ka shumicën, pazaret politike s’mund të zëvendësojnë legjitimitetin demokratik
Lidhja Demokratike e Kosovës, përmes një komunikate për media, ka reaguar pas dështimit të radhës në Kuvend për konstituimin e legjislaturës së re, duke theksuar se Lëvizja Vetëvendosje nuk ka shumicën e nevojshme për të formuar institucionet.
LDK vlerëson se kjo situatë u konfirmua sërish gjatë seancës së sotme, kur për herë të tretë Kuvendi nuk arriti të konstituohet, ndërsa kandidatura e Albulena Haxhiut për kryetare Kuvendi nuk siguroi votat e mjaftueshme.
“Sot Kuvendi i Republikës së Kosovës dështoi për herë të tretë të konstituohet, duke konfirmuar se Lëvizja Vetëvendosje nuk ka shumicën e domosdoshme parlamentare për formimin e institucioneve të reja. As pazaret politike dhe as shkeljet procedurale nuk mund të zëvendësojnë legjitimitetin demokratik dhe vullnetin e deputetëve të zgjedhur nga qytetarët”, thuhet në deklaratën e LDK-së.
Partia opozitare deklaron se nuk do të marrë pjesë në asnjë proces që, sipas saj, cenon rendin kushtetues, ndërsa akuzon Vetëvendosjen për përpjekje të vazhdueshme për të ndikuar mbi vullnetin e deputetëve përmes presioneve dhe kalkulimeve të dyshimta.
“Çdo përpjekje për të shtyrë përpara agjenda politike pa shumicë absolute është cenim i demokracisë dhe shkelje e rregullave parlamentare”, thekson LDK.
Në komunikatë, LDK rendit pesë qëndrime kryesore:
-
Pranimi i dorëheqjeve verbale nga anëtarët e Qeverisë të certifikuar si deputetë ka hapur rrugën për konstituimin formal të legjislaturës.
-
LDK mbetet e palëkundur në refuzimin për të marrë pjesë në procese që cenojnë rendin kushtetues dhe procedurat demokratike.
-
Çdo zyrtar që ka bërë betimin si deputet dhe vazhdon të marrë vendime ekzekutive pas 27 marsit, po shkel ligjin dhe duhet të hetohet.
-
Pavarësisht përpjekjeve për presion dhe manipulim, realiteti është i qartë: Vetëvendosje nuk i ka numrat.
-
Qeverisja kërkon minimalisht 61 vota – çdo tentativë për të qeverisur pa to është joligjore dhe anti-demokratike.
Në përfundim, LDK nënvizon nevojën për stabilitet institucional dhe legjitimitet të plotë politik, duke theksuar se nuk do të lejojë bllokadën e shtetit për interesa partiake.
“Rruga e vetme përpara është respektimi i plotë i Kushtetutës dhe i ligjit. Lidhja Demokratike e Kosovës do të vazhdojë të jetë zëri i arsyes, i ligjshmërisë dhe i përgjegjësisë demokratike – gjithmonë në shërbim të qytetarit dhe të shtetit të Kosovës”, përfundon komunikata.
