Zhbllokim i pjesshëm në Kuvend – por kriza vazhdon

Të martën paradite u dhanë sinjale të forta për zhbllokimin e Kuvendit të Kosovës. Deputeti i VV-së, Dimal Basha, u zgjodh kryeparlamentar me 73 vota për, duke siguruar edhe mbështetjen e PDK-së dhe AAK-së. Megjithatë, zgjedhja e tij u shoqërua me kritika për “degradim të pozitës së kryeparlamentarit”.

Pas fjalimit të parë, Basha shpalli pauzë njëorëshe, e cila zgjati më gjatë. Më pas, deputetët u kthyen për të zgjedhur nënkryetarët e Kuvendit. Albulena Haxhiu (VV), Vlora Çitaku (PDK) dhe Kujtim Shala (LDK) u votuan me 101 vota për.

Telashe me zgjedhjen e nënkryetarëve nga komunitetet

Problemet lindën te zgjedhja e nënkryetarëve nga komunitetet jo-shumicë. Përmes një propozimi të Ministrit në detyrë për Komunitete, Emilija Redžepi u zgjodh nënkryetare nga komunitetet joserbe. Ndërkohë, përfaqësimi nga komuniteti serb mbeti i pazgjidhur.

Lista Serbe propozoi tre herë radhazi Slavko Simiqin, por ai nuk arriti të marrë votat e nevojshme. Pas konsumimit të tre tentativave, Kryeparlamentari Basha tha se e drejta e këtij kandidati ishte shteruar. Lista Serbe refuzoi të propozojë emër tjetër.

Në këtë situatë, Basha aktivizoi procedurën e shortit, por Lista Serbe e refuzoi edhe atë. Në sallë mbeti vetëm Nenad Rashiq, i cili vetëpropozoi veten për nënkryetar dhe mori votat e VV-së, por pa mbështetjen e duhur për t’u zgjedhur.

Akuza për shkelje të Kushtetutës

Eksperti i D+ Albert Krasniqi deklaroi se procesi është zhvilluar në kundërshtim me Kushtetutën dhe Rregulloren e Kuvendit. Ai theksoi se:

• nënkryetarët e komuniteteve jo-shumicë duhet të zgjidhen me një votim të vetëm, në bllok;

• kandidati serb mund të propozohet vetëm nga Lista Serbe;

• shorti mund të aktivizohet vetëm kur nuk ka propozime dhe gjithmonë me pjesëmarrjen e deputetëve të komunitetit përkatës.

Reagimi i opozitës dhe paralajmërimi për krizë

Kryetari i LDK-së, Lumir Abdixhiku, kritikoi ashpër PDK-në dhe AAK-në për votën e dhënë për Bashën, duke e quajtur “gabim trashanik”. Ai paralajmëroi se vendi po hyn në një krizë të re kushtetuese për shkak të moszgjedhjes së nënkryetarit nga komuniteti serb:

“Fatkeqësia më e madhe është që institucionet e Kosovës të mbeten peng i vullnetit të Beogradit”, tha Abdixhiku.

Çfarë pritet më tej?

Me konstituimin e pjesshëm të Kuvendit, pritet të hapet rruga për formimin e qeverisë. Sipas Kushtetutës, Presidentja duhet të mandatojë subjektin fitues të zgjedhjeve, që është Vetëvendosje e Albin Kurtit.

Kurti kishte deklaruar se në ditën e konstituimit të Kuvendit do të votohej edhe qeveria, por numrat mbeten të pasigurt. Për qeverinë duhen së paku 61 vota pro. Nëse mandati i parë dështon, Presidentja ka të drejtë t’i konsultojë sërish partitë dhe të japë mandatin e dytë. Në rast të një tjetër dështimi, shpallen zgjedhje të reja brenda 40 ditësh.