Në një seancë dëgjimore në Komitetin për Politikë të Jashtme të Dhomës së Përfaqësuesve, ligjvënës dhe ekspertë amerikanë i bënë thirrje administratës Trump të rrisë angazhimin në Ballkanin Perëndimor, duke paralajmëruar për rritjen e ndikimit rus, kinez dhe serb në destabilizimin e rajonit.
Kryetari republikan Keith Self e cilësoi Ballkanin Perëndimor si “rajonin më të paqëndrueshëm në Evropë” pas Ukrainës, duke theksuar se marrëdhëniet e pazgjidhura Kosovë–Serbi po i hapin rrugë ndërhyrjes ruse dhe dobësimit të NATO-s. Ai paralajmëroi se në rast konflikti, vendet aleate të NATO-s në rajon mund të përballen me kërcënime të drejtpërdrejta.
Demokrati William Keating kritikoi administratën Trump për heqjen e sanksioneve ndaj Millorad Dodikut, duke kërkuar qasje më të ashpër ndaj korrupsionit në Serbi dhe distancim të Beogradit nga Moska dhe Pekini.
Ekspertët e ftuar vlerësuan se Rusia po e përdor Serbinë dhe Republikën Sërpska për destabilizim, ndërsa Kina po fuqizon ndikimin përmes marrëveshjeve ekonomike dhe bashkëpunimit ushtarak. Ata kërkuan që SHBA të forcojë rolin e saj në rajon, të mbështesë Bosnjen dhe të shtyjë Serbinë drejt një zgjedhjeje strategjike pro-perëndimore.
Shumë nga folësit theksuan se stabiliteti i rajonit varet nga normalizimi i Serbisë dhe se lidershipi amerikan është thelbësor për frenimin e ndikimit rus dhe kinez, si dhe për avancimin e aspiratave euroatlantike të Ballkanit Perëndimor.( REL)
