Hashim Thaçi dhe Donald Trump ndajnë të njëjtin prokuror – Jack Smith. Ndërsa rasti i Trumpit u pushua pas zgjedhjeve presidenciale, Administrata e tij tani po kërkon të njëjtin rezultat edhe për Thaçin. Richard Grenell, i emëruar nga Trump për misione speciale, dje, në 17-vjetorin e pavarësisë së Kosovës, kërkoi lirimin e Thaçit, duke e quajtur gjykimin e tij një “padrejtësi të rëndë”. Përveç kësaj, Grenell i referohet ish-Kryeministrit dhe Presidentit të Kosovës si “ati themelues i shtetësisë së Kosovës”. Grenell, ish-i dërguari i presidentit Donald Trump për dialogun Kosovë-Serbi, uroi Kosovën për 17 vjet pavarësi. Megjithatë, ai shprehu zhgënjimin që Hashim Thaçi, të cilin e quajti “at themelues” të Kosovës, ndodhet prapa grilave në vend që të festojë në Prishtinë.
Grenell e bëri fajtore për këtë “padrejtësi të rëndë” si europianët ashtu edhe institucionet e Kosovës, duke e përmendur në fund edhe emrin e prokurorit Jack Smith.
“I uroj të gjithë miqve të mi në Kosovë një festë të gëzueshme dhe të sigurt në 17-vjetorin e pavarësisë së tyre. Megjithatë, ky moment historik është lënë në hije nga një padrejtësi e rëndë. Ati themeltar i shtetësisë së Kosovës, presidenti Hashim Thaçi, duhet të festojë sot në Prishtinë – jo prapa grilave në Hagë. Europianët nuk kanë arritur të veprojnë kundër kësaj padrejtësie në 5 vitet e fundit. Dhe institucionet shtetërore të Kosovës kanë dështuar të ndërmarrin veprimet e nevojshme ligjore për t’i dhënë fund kësaj padrejtësie – për shkak të politikës. Ky burgim i padrejtë duhet të marrë fund. #JackSmith”, shkroi Grenell.
Kryeministri i Shqipërisë, Edi Rama, iu bashkua thirrjes së Grenell për lirimin e Thaçit, duke shpërndarë postimin e Grenellit në X dhe duke shkruar: “Absolutisht! Dhe sa më shumë të vazhdojë, aq më e madhe është njolla në organin ndërkombëtar të drejtësisë!”.
Grenell, edhe para se të merrte post në Administratën e Trumpit, kishte avokuar për zhbërjen e Gjykatës Speciale dhe kishte qenë ashpër në kritikat e tij ndaj prokurorit Jack Smith. Një vit më parë në Top Channel, Grenell kishte thënë se ajo që kishin bërë europianët ishte skandaloze.
“Kryeministri Rama ka folur shumë hapur për z. Hashim Thaçi dhe çfarë po bëjnë europianët në gjykatën e drejtësisë në Hagë. Ai e ka quajtur Thaçin peng, dhe kjo që po bëjnë europianët është skandaloze. Duhet të jemi të aftë të shohim përpara. Duhet ta lirojnë Thaçin, duhet ta pranojnë se çështja e Jack Smith ishte politike. Europianët duket sikur po bëjnë një punë të pistë për shkak të politikës”, kishte thënë Grenell.
Analisti Mentor Nazarko vuri në dukje se sinjalet e Grenell janë konstante dhe se zhbërja e Gjykatës Speciale duhet të vijë si nga brenda Kosovës ashtu edhe nga ndërkombëtarët. “Ka disa shenja që konvergjojnë dhe duhet të vijnë nga dy fronte, edhe nga brenda Kosovës dhe nga ndërkombëtarët. Grenell ka qenë i qartë në këtë drejtim. Po ashtu, duhet të ketë një akt juridik nga brenda Kosovës për të rimodeluar ose zhbërë Gjykatën Speciale”, tha Nazarko.
Dhomat e Specializuara dhe Zyra e Prokurorit të Specializuar financohen kryesisht nga Bashkimi Europian, ndërsa SHBA-ja ka kontribuar me një pjesë të stafit. Jack Smith, i cili kishte qenë prokuror i nivelit të lartë në Departamentin e Drejtësisë të SHBA-së, u emërua kryeprokuror në Prokurorinë e Specializuar në Hagë në shtator 2018 dhe hetoi Thaçin dhe të tjerë për krime lufte. Megjithatë, në nëntor 2022, Smith la pozicionin e tij në Hagë për t’u bërë Këshilltar Special i Departamentit të Drejtësisë së SHBA-së, ku u përgjegj për dy çështje penale kundër Trump. Të dyja rastet u mbyllën pas fitores së Trump në zgjedhjet presidenciale.
Në tetor 2024, Trump deklaroi se do të përdorte kompetencat presidenciale për të ndaluar hetimet e Jack Smith kundër tij, duke thënë: “Do ta pushoja brenda dy sekondave”. Megjithatë, Smith dha dorëheqje në janar 2023, para se Trump të betohej.
Ndërkohë, në Dhomat e Specializuara në Hagë, Thaçi dhe Veseli u vendosën në paraburgim për dy muaj të tjerë, ndërsa Thaçi mungoi në seancë për arsye shëndetësore. Zyra e Prokurorit të Specializuar ka ngarkuar Thaçin, Veselin, Krasniqin dhe Selimin me dhjetë akuza për krime lufte dhe krime kundër njerëzimit.
