Dialogu Strategjik Serbi–SHBA: bashkëpunim më i thellë, por dallime për Kosovën dhe Bosnjën
Shtetet e Bashkuara dhe Serbia po përgatiten për nisjen e një Dialogu Strategjik, i cili synon të thellojë bashkëpunimin në fusha si ekonomia, siguria dhe politika e jashtme.
Analisti i politikës së jashtme, Boshko Jakshiq, tha për Shërbimin e Ballkanit të Radios Evropa e Lirë se marrëdhëniet mes Beogradit dhe Uashingtonit po përparojnë, megjithëse dy vendet mbeten me qëndrime të kundërta për Kosovën dhe Bosnjën. Sipas tij, mbështetja amerikane për Kosovën dhe mosnjohja e saj nga Serbia, si dhe përkrahja e Beogradit për Millorad Dodikun në Bosnjë, mbeten pikat kryesore të ndarjes.
Ndërkohë, administrata e presidentit amerikan Donald Trump ka pezulluar përkohësisht Dialogun Strategjik me Kosovën, duke kritikuar veprimet e Qeverisë në detyrë të Albin Kurtit për rritjen e tensioneve në veri të vendit.
Dialogu Strategjik është paralajmëruar gjatë muajve të fundit në takimet e presidentit Aleksandar Vuçiq me zyrtarë amerikanë, përfshirë sekretarin e Shtetit, Marco Rubio, në Nju Jork. Ai pritet të përfshijë tema nga ekonomia te siguria dhe energjia, ngjashëm me dialogjet që SHBA-ja zhvillon me vende të tjera partnere.
(Përgatiti: Mimoza Sadiku, Radio Evropa e Lirë/REL)
