BE-ja, OSBE-ja dhe organizatat e gazetarëve kanë dënuar ashpër gjuhën e përdorur nga Sami Kurteshi, anëtar i LVV-së në KQZ, ndaj mediave, pasi ai i quajti ato “kriminale” dhe “vrasës me pagesë”.
Në një reagim në Facebook, Zyra e BE-së në Prishtinë kërkoi t’i jepet fund një gjuhe të tillë, duke theksuar se liria e medias duhet të mbrohet në çdo demokraci. Edhe OSBE-ja e cilësoi sjelljen e Kurteshit si të “papranueshme”, duke kërkuar standarde më të larta profesionalizmi nga përfaqësuesit politikë.
Incidenti ndodhi më 2 dhjetor gjatë një mbledhje të KQZ-së, kur Kurteshi u konfliktua me gazetarët dhe kërkoi largimin e tyre në “këndin e mediave”, duke i akuzuar për shpifje.
Asociacioni i Gazetarëve të Kosovës (AGK) reagoi menjëherë, duke e quajtur Kurteshin “recidivist” në sulmet ndaj gazetarëve dhe kërkoi ndërhyrjen e LVV-së. Më pas, Kurteshi publikoi një status në Facebook, ku e quajti AGK-në “Aleanca e Grupeve Kriminale” dhe renditi disa media si “vrasës me pagesë”.
Reagime pati edhe nga Federata e Gazetarëve Evropianë (FGE). Sekretari i saj, Ricardo Gutierrez, i kërkoi kryeministrit në detyrë, Albin Kurti, të ndalë menjëherë “fushatën e njollosjes” ndaj gazetarëve, duke e cilësuar atë të rrezikshme për lirinë e medias dhe besueshmërinë e institucioneve.
