ASK: Qeveria shpenzoi gati 785 milionë euro në tremujorin e dytë, 106 milionë më shumë se vitin e kaluar

Agjencia e Statistikave të Kosovës (ASK) ka njoftuar se shpenzimet e Qeverisë së Përgjithshme në tremujorin e dytë të vitit 2025 kanë arritur në 784.9 milionë euro. Krahasuar me periudhën e njëjtë të vitit 2024, kjo është një rritje prej 105.8 milionë eurosh.

“Gjithsej shpenzimet e Qeverisë së Përgjithshme në TM2 2025 ishin 784.9 milion Euro, ndërsa në TM2 2024 ishin 679.1 milion Euro”, thuhet në publikimin e Llogaritjes Qeveritare nga ASK.

Sipas të dhënave, pjesën më të madhe të shpenzimeve e zënë:

• kompensimi i punëtorëve (28%);

• kontributet sociale dhe përfitimet (26%);

• formimi i kapitalit bruto (15%);

• konsumi i ndërmjetëm (14%).

Pjesa tjetër e shpenzimeve është shpërndarë në kategori të tjera.

Agjencia e Statistikave të Kosovës (ASK) ka bërë të ditur se të hyrat e Qeverisë së Përgjithshme në tremujorin e dytë të vitit 2025 kanë arritur në 972.6 milionë euro, nga 782.6 milionë euro sa ishin në periudhën e njëjtë të vitit 2024.

Sipas ASK-së, pjesën më të madhe të të hyrave e përbëjnë:

• tatimet në produkte (64%);

• tatimet rrjedhëse në të ardhura (16%);

• aktivet dhe detyrimet financiare (10%).

Pjesa tjetër është shpërndarë në kategori të tjera të të hyrave.