Kosova arreston një shtetas të Serbisë për sulm ndaj policëve në Jarinjë
Policia e Kosovës ka arrestuar një shtetas të Serbisë në pikën kufitare të Jarinjës, pasi ai ka sulmuar zyrtarët policorë.
Ngjarja ka ndodhur më 2 tetor, rreth orës 04:55, dhe njëri nga policët ka marrë tretman mjekësor, sipas raportit 24-orësh të Policisë. Për rastin nuk janë dhënë detaje të tjera.
Pika kufitare e Jarinjës, që ndodhet në Leposaviq, lidh Kosovën me Serbinë dhe është një nga pikat më të ndjeshme në veri, ku në të kaluarën kanë ndodhur incidente të shumta.
Sigurinë e kufijve të Kosovës e mbikëqyr misioni i NATO-s, KFOR, që nga viti 1999, bazuar në Marrëveshjen Ushtarako-Teknike të Kumanovës, ndërkohë që patrullimet kryhen edhe nga Policia e Kosovës.
